Amahubo 16: Indlela eya ekuphileni

Enye yezinto ezangenza ngangahlaliseka ngingumzalwane nje ongagxilile kwakungenxa yokuthi

zimbili izindlela zokuphila. Kuphakathi kokuthi ukhonza uNkulunkulu yena yedwa futhi uzinikele

ngokupheleleyo kuye noma ukhonza abanye onkulunkulu. Akukho ongathi akucacile. Kuphakathi

kwalokho nje. Lelihubo liyihubo lokwethemba - Ngokuthi, yize noma liqala ngamazwi okukhala

okungukufuna usizo, akusilo ihubo lesililo. Lihlanganisa umkhuleko nengoma noma ihubo,

ukukholwa nokwethembeka kuNkulunkulu (Ross, 2011, pp. 399-400: okuhunyushwe ngolimi

lesiZulu). Ihubo lingumsebenzi walowo owaziyo ukuthi zimbili izindlela zokuphila, ube esekhetha

ukuphila impilo yokuzinikela kuNkulunkulu. Lokhu kungubufakazi emkhulekweni wakhe ukuthi

ukhethe ukuzibandakanya nobani, indlela yokwaneliseka kwakhe nokuphepha kwakhe emhlabeni,

ekugcineni nethemba lakhe lokuphepha ngisho ekupheleni kwempilo yakhe.

Ukukholwa ku Yahweh (uJehova onguye) kuphela (1-4)

Ihubo livula ngesicelo sosizo kuNkulunkulu. Akucaci bha ukuthi umbhali wehubo ufuna

ukulondolozwa kwini. Kungabe ubhekene nobungozi? U-Weiser akacabangi ukuthi ubhekene

nenkinga. Kepha ucabanga ukuthi umbhali wehubo “uyakhuleka nje ukuthi uNkulunkulu amuvikele

ngaphambili njengoba ebenze njalo ngemuva … Ngakho-ke umkhuleko uqubuka kokwezenkolo

okujwayelekile kumdumisi owaziyo ukuthi uvikelwe nguNkulunkulu ngenxa yobukhona bakhe

ethempelini.” (1959, p. 172-173).

U Weiser ulungile ukuthi athi umkhuleko uqubuke kubudlelwane umbhali wehubo anabo

noNkulunkulu. Kepha, Ngiyacabanga ukuthi umbhali wehubo wayebhekene nobungozi. Hlampe

ubungozi bokuhlubuka uma ubuka izifungo zakhe ezimelene nonkulunkulu (vs. 4) Noma ubungozi

obumenza adlinze ngokufa (vs. 10 – 11). Lokhu kuvela ngokuthi amanye amahubo anjengaleli

(Amahubo 56 – 60, hlampe ngale kwehubo 60)akhuluma ngobungozi obuseduze obuvela kwizitha.

Kepha-ke okucacile ngukuthi noma ngabe yibuphi ubungozi abhekene nabo, usizo lakhe luvela

eNkosini.

Lomkhuleko unolwazi lwemithetho eyishumi. U Walford nabhala nabo babuka kahle ekuhlanganiseni

kwabo ukuncenga kwethemba, ukuthemba umthetho wokuqala, engizongeza kukho ukuthi

kuyahambisana futhi nesisho sokulalela ngoSimakade “uSimakade uNkulunkulu wethu, uSimakade,

munye” (IDut 6:4) (2014,p.179). Isihloko esithungela ndawonye sehubo yintokozo nenjabulo

okuqhamuka kuNkulunkulu yedwa, inkosi umninimandla onke. Lokhu kufakazeleka kokuphambene

okuvezwa kumavesi amane okuqala phakathi kokuthokoza kubazalwane Kanye nokudeda kwizoni.

Thokoza kubazalwane

Enye indlela yokuveza ukuzinikela kuNkulunkulu ukuthakasela lokhu akuthakaselayo. Umbhali

wehubo unokuthakasela ngenjabulo abantu baNkulunkulu, abazalwane/abangcwele. U Walford

nabhala nabo, ngokulungile bathi yize noma igama abangcwele likhuluma ngabasezulwini noma

onkulunkulu noma izingelosi, lokho kufanelekile, kephe-ke iqiniso lingukuthi umbhali wehubo

uthokoza kubo laba abangcwele (vs. 3) okungeke kuze kuvumelane nomunye umcabango ngale

kokuthi labangcwele okukhulunywa ngabo ngumphakathi ongcwele ozinikele kuJehova Onguye

(Yahweh), (2014, p. 179). Ngakho-ke emphakathini wabantu abathola ukwaneliseka kwabo

kuNkulunkulu yedwa, lapho-ke umbhali wehubo uthola ukuthokoza kwakhe futhi.

Deda Kwizoni

Njengokuba sekushiwo, zimbili kuphela izindlela zokuphila. Ukukhetha enye kusho ukushaya indiva

enye. U-Adamu no Eva ngokulalela nje nokwenza lokho abakuyalelwa yinyoka bashaya indiva

uNkulunkulu. Umbhali wehubo lapha wenza okuphambene. Ukhetha uNkulunkulu ashaye indiva

indlela yalabo “abangenasabelo esibusisweni sikaNkulunkulu” (Lane, 2006, p. 84). Futhi,

kunomqondo wemibhalo kaMose.

Ukwanda kosizi kuveza umqondo wokwehla kokuwa. Kusukela kwisiqalekiso sokwanda benhlungu

kowesifazane obelethayo kuya emsebenzini onzima kuze kube ngukuqalekiswa kokwahlukana

nokudideka ekwakheni umbhoshongo waseBhabhele (IGen 3-11). Kepha, injabulo yombhali wehubo

iyafakazeleka, kungesikho ekuhlanganyeleni nabangcwele kuphela, kepha nasekuboneni inkolo

yabangakholwayo njengoba injalo, ukuhlupheka okungapheliyo. Njengokuba umbhali ehlukana

nezoni ngokuba “Ubudlelwane noNkulunkulu buyongamela impilo yomuntu yonke, ngokuba

uNkulunkulu ukhomba umuntu wonke njengowakhe…ukunakekela kukaNkulunkulu abantwana

bakhe kufaka ukukhetha noma ukukhomba kwakhe kubantu kushaye indiva bonke ubudlelwane

nabanye onkulunkulu.” (Weiser, 1995, p. 173 – 174).

Ukufingqa, kuze kube manje sibonile ukuthi umbhali wehubo ungumuntu ozinikele kuNkulunkulu.

Ukuzinikela kwakhe kufakazeleka ngokusobala kulabo akhetha ukuzibandakanya nabo, labo

abangcwele uma uqhathanisa nabantu abangenasabelo kwizibusiso zikaNkulunkulu. Ngalokho-ke,

ukuzinikela kuNkulunkulu ngukwehlukana nonkulunkulu.

Manje-ke, umthandazo wombhali wehubo uyaguquka ekuvumeni kokukholwa uye ethembeni analo

empilweni ngenxa yokukholwa kwakhe.

Ukuphepha ku Yahweh (uJehova onguye) kuphela.

Isivumo sombhali wehubo sokukholwa kuJehova onguye kuphela. Ukuzethemba kwakhe kuqubuka

ebudlelwaneni anabo noNkulunkulu. Kahle hle, ukuzethemba kombhali wehubo kuqubuka ekubeni

noNkulunkulu njengomluleki othembekile. Ukhona yini umeluleki oncono kunalowo owazi ukujula

kwenhliziyo yomuntu anikeze ukubuka endleleni eholela ekuphileni. Ngesipiliyoni nethemba,

umbhali wehubo uyazi ukuthi ezandleni zikaNkulunkulu onjalo uphephile kubuwula balelizwe

nokwahluleka ukuzuza ukuphila ekugcineni.

Ukuphepha ezweni

Ukululeka kukaNkulunkulu kungokuletha ukuthokoza ngokwenziwe yinkosi. Ngokuba uNkulunkulu

uqobo lwakhe, iNKosi, kuphela uNkulunkulu okhona, uyisabelo sakhe. Uma uqhathanisa nalaba

abalandela abanye onkulunkulu bezizuzela ukuhlupheka. Uyifa elipheleleyo lokuthokoza

okutholakalayo. Bobabili yena nabangcwele, uNkulunkulu akabaphanga kuphela isipho esingekho

emhlabeni (Inun 33:50. IDut 32:8-9) kepha nonembeza ovusiwe.

Ngenkathi uNkulunkulu ebhubhisa umhlaba ngozamcolo, kwakungenxa kanembeza olukhuni

woluntu (IGen 6:5). Ngakho-ke kungabekwa ukuthi inhliziyo evusiwe maqondana nokuyala

kukaNkulunkulu iveza umsebenzi kaMoya Ongcwele. Yayinjalo inhliziyo yombhali wehubo. Imini

nobusuku, uMoya kaNkulunkulu umuholela ekulungeni. Futhi wayazi ukuthi ayikho into enhle ekuye

ngokuba usizo lakhe aluveli kuye uqobo kepha luvela enkosini, phambi kwayo, nakwesokunene sayo,

gcina mina, Nkosi! Ngakho-ke ngokwesipiliyoni sombhali wehubo wayenethemba “nesiqiniseko

sosizo lukaNkulunkulu noma nini uma esebungozini nokuyala kukaNkulunkulu nokuhola kwakhe

maqondana nezinqumo okumele azenze.” (Weiser, 1959, p. 176). Inhliziyo yakhe ethobekile yayi

yisipho sobukhona bukaNkulunkulu empilweni yakhe. Futhi, Emoyeni ka Shedraki,Mishako no

Abednego, ngisho inhlekelele noma inhlupheko kumengamela, ukufa kuye kuyoba ngumnyango

omyisa enjabulweni yaphakade.

Ukuphepha ekugcineni

Umbhali wehubo akathembi ukuyala kukaNkulunkulu ekumhlinzekeni kuphela ngempilo enhle,

kepha ekuyaleni kukaNkulunkulu okugcina impilo yakhe ngisho emva kokufa. Lokhu kuthemba

kwesibili kuseduze nokokuqala. Kungenxa yokuthi uyazi ngokukholwa ukuthi ngisho angafa angeke

aze afe, ukuthi okokuqala uyothokoza kwisiqiniseko anaso emhlabeni. Ngokuba iyini impilo emnandi

uma ukufa kuzofika kuqede konke. Kodwa ngokuba uNkulunkulu kwisabelo sakhe, uNkulunkulu

uyogcina impilo yakhe ethuneni, amholele ekuthokozeni kwengunaphakade ebukhoneni bakhe.

Kepha asive sesiphambili kakhulu lapha. Asive silindele ngokulangazelela isifundiso sovuko

esingabonakala lufifi ngesikhathi sakhe? Lokho kungaba yiqiniso, ngokuba vele ishiwoli (ithuna)

kwithestamente elidala yindawo engenalutho, kungekho nhlungu kungekho kuzwa (Goldingay,

20213, np). Kepha umbono wami kulokhu; kuveza ukuthi uDavide wayengaqondi kanjalo.

Kuze kube yimanje angikaze ngiveze ukuthi uDavide uyena umbhali walelihubo ngoba ngicabanga

ukuthi kulapha lakuvela khona ukukhanya kulombhalo. UGoldingay uthi kungase kube “ngumfelokazi

omdala ozinikele” (2006, 40-41). Kepha angicabangi ukuthi kungaba njalo. Okokuqala, amahubo

anjengalawa encwadini yamahubo (Amah 56 – 60) abalelwa kuDavide, okubalwa nehubo 16.

Ngokujwayelekile futhi, ingxenye yokuqala encwadini yamahubo ibalelwa kuye uDavide. Yize noma

singenaso isiqiniseko esiqanda ikhanda ukuthi uDavide wabhala amahubo, kepha nje ngenxa yokuthi

isihloko sehubo singaye kusenza sikwazi ukuma ekutheni ukubhala ngokwakhe kunawo wonke

omunye umuntu. Nabaphostoli babecabanga ukuthi umbhali nguDavide (Ize 2:25–29, 13:35–36).

Ngakho-ke kukaningi ukuthi uDavide kube nguye umbhali wehubo.

Uma ubuka lokhu okungaphezulu, maqondana nesifundiso sovuko uDavide wayazi ukuthi ukufa

kuyomfica nokuthi ngandlela thize umbuso wakhe uzoqhubeka kuze kube phakade (2 Usam 7:11-

16). Uma ngabe imbewu yakhe izakuphakanyiswa ngalendlela, uDavide wayengeke akhulekele

ukuphila impilo ende aze abone isithembiso sikaNkulunkulu sifezeka kuze kube phakade. Ngakho-ke

umkhuleko kaDavide kwakungowokugcinwa kwempilo emzimbeni nasemoyeni, ukuze ezophila

noNkulunkulu, ekuNkulunkulu ingunaphakade. Impela, njengokuba umphostoli uPetru eveza,

umkhuleko kaDavide wawungumkhuleko oyisiphrofetho owagcwaliseka kuJesu (Ize 2:14-3).

Ngizongeza amazwi kulokhu ngokubaluleka kwakho kwamanje, kepha asibe sivala.

Sibonile ukuthi uDavide wayeyindoda yomqondo owodwa, indoda eyayizinikele kuNkulunkulu.

Ukukholwa kwakhe kuNkulunkulu kwamuvulela ithuba lokungahlali akhihle isililo, kepha ukuthi

aphakame ngokuthemba iNkosi. Ngisho ebhekene nezinkinga uDavide wayethokoza empilweni

iNkosi emabele yona. Futhi ngenxa yethemba lempilo ngale kwethuna uNkulunkulu ayomuhola

kuyo. “Ubungani noNkulunkulu (obube yiqiniso empilweni), angeke kuqedwe ngukufa…” (U-

Augustine wacaphuna ku Waltke nabhala nabo, 2019, p. 309). Futhi lokhu ngukulangazelela ukuvuka

kukaKristu Kanye namakholwa okulandelayo. Ithemba eliphilayo lokuphila.

Ukubaluleka kusemanje

Ithemba eliphilayo likaDavide

Ukuthatha futhi kwisingeniso sami, izindlela ezimbili zokuphila kunesizathu esisodwa esingenzeki

ngokupheleleyo engqondweni yami. Isikhathi eside ngangingakwazi ukuqeda ukuba sivivi. Isizathu

salokho ngukuthi imikhuleko yami kwakubonakala sengathi iphelela emafwini. Kepha manje, uma

ngibheka emuva ngiyabona ukuthi imikhuleko yami yayihlezi ingukukhalela ukuhlengwa kepha

ngingenalo ithemba ekulungeni kukaNkulunkulu. Ngangifana nesixuku kwinganekwane yase Afrika

esanyuka sayokhulekela imvula kepha waba yedwa umntwana owanyuka ephethe isambulela.

Umkhuleko njengoba sibonile uveza ithemba nokukholwa okuqinile ekuthembeni iNkosi. Uma

ubhekene nenhlekelele noma inhlupheko, uDavide unethemba elinganyakaziseki ekupheni noma

ekunikezeni kukaNkulunkulu. Ukuthemba kwakhe kuya ngale kokuphila esikwaziyo kuye ekuphileni

okungale kwalokhu kuphila. Umthombo walelithemba lakhe akusikho kuphela lokhu uNkulunkulu

amenzele kona yena nabantu bakhe, kepha kwakukulokhu uNkulunkulu ayemuthembise kona.

Kwisithembiso senzalo, eyayizolandela uDavide esihlalweni sobukhosi kubekwe isihlalo

sikaNkulunkulu saphakade. UDavide wathola ithemba lempilo elamenza alale kahle ebusuku ngisho

enhluphekweni. Ngamanye amazwi, siyabona kwithemba likaDavide ukuthi ukuphepha akutholakali

lapho kungekho khona ubungozi, kepha ekwazini ukuthi uNkulunkulu unawe ngisho ethunzini lokufa

(Amahubo 23). Futhi lena yimpilo abazalwane abamenyelwa kuyo ngisho nanamuhla ekuvukeni

kwenkosi uJesu Kristu owayaziwa nguDavide ngesethembiso kepha amakristu amazi ngomsebenzi

wakhe kanye nezimfundiso zakhe esenyameni. Ekuvukeni kukaKristu, amakristu namhlanje, ngisho

ebhekene nokufa okungevinjwe, angaphila nethemba nentokozo elingana neyombhali wehubo,

“iNkosi iyangazisa indlela yempilo” (Mays, 1998, pp 88-89). Ngakho-ke thina amakristu namhlanje

singathola izwi lethu sikhuleke lelihubo njengamazwi kaNkulunkulu olimini lwethu. Okwakuyithemba

likaDavide ngesithembiso, manje kuyithemba lethu eliphilayo lokuvuka.

I-Bibliography

deClaisse-Walford, N., Jacobson, R. A. & Tanner, B. L., 2014. In: E. J. Young, R. K.

Harrison & R. L. Hubbard, JR., eds. The Book of Psalms. Grand Rapids, Michigan: Eerdmans

Piblishing.

Goldingay J., 2006. Psalms (3 vols). Grand Rapids, Mi.: Baker Academic.

Goldingay, J., 2013. Psalms for everyone, part 1 (psalm 1-72), Louisville, KY : Westminster

John Know Press.

Lane, E., 2006. Psalm 16 David FAces Trouble in Family and Nation. In: F. o. t. B. C. Series,

ed. Psalm 1-89: The Lord Saves. Fearn: Christian Focus Publications, pp. 83-86.

Mays, J. L., 1989. Psalms. interpretation, A bible Commentary for Teaching and Preaching.

Louisville: John Knox Press.

Ross, A.P., 2011. A commentary on the Psalms (3 vols).  Grand Rapids, Mi.: Kregel

Academic & Professional, pp. 397-413. 

Waltke , B. K., Houston, J. M. & Moore, E., 2010. The Psalms as Christian Worship: A

Historical Commentary, Grand Rapids, Michigan: William B. Eerdmans.

Weiser, A., 1959. The Psalms. Gottingen: Vandenhoeck & Reprecht.