Umusa Wakho Ungefaniswe

Umusa wakho ungefaniswe,

Impela mkhulu ubanzi, nangolwandle ungelinganiswe

Siyawubona kuye uKhrist’uwuvezile

Lapho singamahlongandlebe, yebo usihlengile

Sisekufeni kwaphakade kepha ngothando wasitakula

Nasezonweni siyavuma wasikhulula

Mkhululi, umusa wakho ungelinganiswe

Ngisehlan’ezidlekeni zokufa wangiphaphamisa

Wangibonisa indlela yakh’ egcwel’ umusa,

Wangishiya ngimangele

Nenhliziyo igcwele.

Impela intonga nodondolo lwakho zingiduduzile,

Ngiyimv’elahlekile njengomalusi ungibuyisile,

Malusi, umusa wakho ungefaniswe.

Ubusuku nemini impela ngiyaphenduphenduka

Ngizibuza kungani wakheth’ ukungiphulukisa,

Uze ungifudumez’ezandleni zakho zothando

 Wangifukamel’ enhlizweni yakh’ egcwel’ impatho,

Ubuwula nobumpumputhe bami ubelaphile

Ngingaboni lutho phela bengifile

Baba, umusa wakho ungelinganiswe

Kawukhethanga bala nanhlanga sonke wasikhulula

Kuy’ uJesu imphefumlo yethu yathola ukuphumula,

Ngemisebenzi yakhe, yebo simenyiwe

Kuwe akukho namunye ongenakhaya yebo sitholiwe,

Emnqam’lezweni ekhala “Kufeziwe”

Izimpi zokufa nesono kwabe sezinqotshiwe

Mnqobi, umusa wakho ungefaniswe.

Sibonise ububi bethu namhlanje phambi kwakho,

Sithambise impakamo silandele indlela yakho

Siqonde ukujula nobubi bezinhliziyo zethu

Sithol’ukuphulukiswa kuyo iNkosi yethu,

Sivul’ amehlo sibone ubuhle bukaKristu

 Siqusakhe onguNkulunkulu nomuntu,

Konke ngomusa wakho ongelinganiswe.