Uthando luka Nkulunkulu ekuhluphekeni
Kuningi ukuqhekeka kulo mhlaba, bambalwa abantu uma bekhona abangasho ukuthi abathinteki yikho. Noma ngabe ungumKristu noma cha, sonke siyakuzwa ngezindlela ezahlukene, ngenxa yokuqhekeka, abanye bazithola sebengabaza ubukhuku bukaNkulunkulu: ” Uma uNkulunkulu ewuphethe ngokuphelele umhlaba kungani kunokuhlupheka okungaka?”
Ukuqhekeka kwalomhlaba kuba umthwalo kakhulu uma sikubona kithina. Ngokuqala konyaka odlule ngahlangana nensizwa ekhampasini ngesikhathi sokushumayela ivangeli. Lensizwa ikhulele ekhaya bekholwa nobaba wayo ungumfundisi. Ngonyaka ka-2022 kuNdasa noma kuMbasa kwenzeka into ebuhlungu ubaba wakhe eyoshumayela kuNkomfa eGoli, wabandakanyeka engozini yemoto. Ngokushesha ngemva kokuthola izindaba zengozi nokuthi uyise ushonile ngenxa yaleyo ngozi, izindaba zakhula zaba zimbi kakhulu ngoba umzimba wakhe waduka waze watholakala ngoZimbandlela walowonyaka. Lokho kulethe isigamu sokududuzeka njengoba isidumbu besesingcwatshwe nguhulumeni futhi umndeni awukwazanga ukumyisa ekhaya ukuze angcwatshwe ngendlela.
Lokhu kulandelana kwezenzakalo kwaletha imibuzo eminingi engqondweni yalensizwa: “Ingabe uNkulunkulu ngempela unguMbusi? Ingabe nguye olawulayo? Uma kunjalo, kungani evumele ubaba ukuba ashone?” Okwakumphatha kabi kakhulu ukuthi uyise wayengumfundisi owayezinikele impilo yakhe yonke emsebenzini kaNkulunkulu futhi ukwengeza, lona kanye uhambo ayekulo kwakuwukushumayela iVangeli. Waqhubeka ebuza, “Uma ngempela uNkulunkulu elawula umhlaba, kungani ubaba engasekho, kungani uvumela umndeni wethu uzwe ubuhlungu obungaka? Kungani kunokuhlupheka okungaka emhlabeni?”
Ezimweni eziningi sithambekele ekucabangeni njengale nsizwa, izimo ezisizungezile zivame ukusiphoqa ukuba singabaze ubukhosi bukaNkulunkulu futhi kwabaningi bethu ukuba baseNingizimu Afrika kungase kubonakale kuyinto enzima kakhulu manje. Sizizwa cishe mihla namalanga uma sibuka izindaba, uma sicabanga ngomnotho wethu ontengantengayo, ukuntuleka kwemisebenzi kudlondlobala. Sicabanga ngabantu abangenacala abashonelwe izithandwa zabo ngesikhathi kune imvula enamandla esanda kuna ezindaweni ezahlukene zezwe lakithi . Ziningi izinto ezenza abantu bangabaze ubukhosi bukaNkulunkulu kulo mhlaba kodwa uma sibheka konke lokho ngifuna sibheke amavesi ambalwa azosisiza ukuthi sibone uthando lukaNkulunkulu nobukhosi bakhe phezu kwakho konke. Uma ubhekene nezikhathi ezinzima, ukuhlupheka nokungabaza uthando lukaNkulunkulu, ngithanda ukukunxusa ukuba ubheke izindima zeBhayibheli ezikhuluma ngokufa kukaJesu. Ngaphambi kokuba sibheke ukuthi uthando lukaNkulunkulu lubonakaliswa kanjani ekufeni kukaJesu, ake sibuyele endalweni. Encwadini kaGenesise sifunda ukuthi uNkulunkulu wadala abantu (u-Adamu no-Eva) ngomfanekiso wakhe, futhi wakwenza ngokukhulu ukucophelela nangenhloso, kodwa ubuhlobo babo baphuka ngenxa yokuwa. Nokho, uthando lukaNkulunkulu lwahlala, futhi sibona icebo Lakhe lokuhlenga nokubuyisela liqala ukwenzeka (1 Petru 1:20). Isithombe esikhulu kunazo zonke sothando lukaNkulunkulu ukuhlushwa nokubethelwa kukaJesu esiphambanweni kwabaseRoma 5:6-8. UPawulu usikhumbuza ukuthi ukuhlupheka kukaJesu esiphambanweni kwakuyisimemezelo esicacile sothando futhi lolu thando alunamibandela. Sasisesimweni esibi kakhulu lapho uKristu esifela. Futhi, kwabase-Efesu 2:4-5 uPawulu uyasikhumbuza ukuthi kungomusa sisindisiwe, futhi lensindiso yenze ukuphila kuchichime. UJesu uthi: “Mina ngizele ukuba babe nokuphila futhi babe nakho kuchichime.”
Phakathi nakho konke ukuhlupheka kwethu kunzima ngangokunokwenzeka ukukholelwa ukuthi uNkulunkulu uyasithanda, 1 Johane 3:16a uthi: “Ngale ndlela siyazi ukuthi luyini uthando: UJesu Kristu wadela ukuphila kwakhe ngenxa yethu.”
Ukuhlupheka akusona isihloko esilula ukusisebenzisa, futhi ngezinye izikhathi kunzima ukuthola induduzo eqinisweni lamazwi kaNkulunkulu. Nokho, nazi ezinye izinto ezimbalwa okufanele sizicabangele njengoba sicabanga ngakho:
- UNkulunkulu unathi ekuhluphekeni kwethu; Uyasibona ekuhluphekeni kwethu futhi usenza sikwazi ukubekezelela ubuhlungu nokuhlupheka. (1 Petru 5:6-11.)
- UNkulunkulu ufuna sigijimele kuye ekuhluphekeni kwethu; njengoba iqokomisa ukuncika kwethu kuye futhi singakuveza ngomthandazo “Ingabe ukhona phakathi kwenu ohluphekayo? Makathandaze ( Jakobe 5:13 )
- Ukuhlupheka kufanele kusenze sikhale, sikhulume noNkulunkulu ngosizi lwethu sithembele futhi silindele insindiso Yakhe njengoba sivuselela ithemba lethu ebukhosini Bakhe (IHubo 13:5-6)
- UNkulunkulu wayengahlosile ubuhlungu nokuhlupheka; konke kungumphumela wokuwa (isono sika-Adamu no-Eva) futhi kuphule inhliziyo kaNkulunkulu lapho sihlupheka kodwa uthembisa ukuphela kwabo bonke ubuhlungu nokuhlupheka kulabo abathola insindiso endodaneni yakhe, uJesu Kristu (Isambulo 21:4)
Kubalulekile futhi ukukhumbula ukuthi ukuhlupheka akuyona into engavamile kuNkulunkulu njengoba athatha isimo somuntu njengeNkosi noMsindisi wethu uJesu Kristu ukuze akhuthazelele ukufa okubuhlungu esiphambanweni. Wenza konke lokhu ukuze ekugcineni aqede zonke izono, ukufa, ukugula nezifo. Ukuze asibuyisele kuye , ukuze lapho ebuya, labo ababeke ithemba labo kuye, ngeke kudingeke siphinde sihlupheke kodwa sibe nokuthula okuhlala njalo nokuphepha nobaba wethu osezulwini kuze kube phakade!
