Emgedeni
Uma echaza uthi sisemgedeni
Unesineke ekusilandiseni ngokuphila kude nasemgedeni
Isineke sakhe sisabuwulana kwabasemgedeni
Uqalaphi ukuchazela inhlanzi ngokujula kolwandle nokusabalala komkhathi
Akakhathali nangokucamela kwewashi
Akadikibali noma sesimkhomba ngophakathi, noma singamnaki
Uthi lomgede awuyazi imisebe yelanga
Esikubiza ngokukhanya ukujwayelwa kwamehlo nezithunzana zengqondo
Uthi nokukhanya esikucela kwabadala ngempepho emsamo nasemathempelini
Konke ukubiza ngemidlalo kaqedisizungu yasemgedeni.
Uthi ijulile imidlalo yabantu abangaboni, ayinamsuka nasiphetho, ukuhleka nokuqiniselana imihlathi kuyefana ebumnyameni
Okwakobanike ukutshelwa ebusheni bakho,
Ekukhuleni kwakho, nasekufeni imbala
Ukuthi ukuphila nezithukuthuku zakho konke kungumdlalo ongenanzuzo. Konke ize leze.
Uma ezichaza yena uthi ungumnikazi wensimu
La kuphumela khona lomgede.
Umema bonke abamlalelayo, bamethembe ekuphileni okunenzuzo ekukhanyeni kwelanga lokulunga
